წელს ელისაბედ II-ის მმართველობის პლატინის იუბილეა, რაც იმას ნიშნავს, რომ ის უკვე 70 წელია გაერთიანებული სამეფოს დედოფალია. ამ თარიღთან დაკავშირებით მრავალფეროვანი ღონისძიებები მთელი ქვეყნის მასშტაბით დაიგეგმა, მათ შორის გამორჩეული სწორედ ბუკინგემის სასახლესთან გამართული კონცერტი იყო, რომლისთვისაც ლეგენდარული მომღერლები მთელი მსოფლიოს მასშტაბით მოიწვიეს. ამ ღონისძიებას 20 000 ადამიანი ფიზიკურად დაესწრო, ხოლო დაახლოებით  13 მილიონი ადამიანი პირდაპირ ეთერში უყურებდა.

გამორჩეულ არტისტებს შორის ერთ-ერთი ამერიკელი მუსიკოსი, კომპოზიტორი და პროდიუსერი ნაილ როჯერსი იყო, რომელმაც სცენის მიღმა კადრები  გაგვიზიარა:

ნაილ როჯერსის თქმით, ასეთი მნიშვნელოვანი მოვლენები ცხოვრებაში ერთხელ ხდება და მსგავსი მასშტაბის ღონისძიებების თანამონაწილეობაც ხშირად ნამდვილად არ უწევს. ბუკინგემის სასახლის წინ მოწყობილ სცენაზე ისეთი არტისტები წარდგნენ, როგორებიც არიან: Queen, ელტონ ჯონი, როდ სტიუარდი და დაინა როსი. ნაილ როჯერსმა კი Duran Duran-თან ერთად სიმღერა Notorious შეასრულა. სრული შოუს ნახვა აქ შეგიძლიათ.

ნაილ როჯერსი ბენდ Chic-ის თანადამფუძნებლიცაა, მისი შემოქმედებითი კარიერა 50 წელს ითვლის და პირველი წარმატება 70-იან წლებს უკავშირდება, როდესაც ბენდთან ერთად ისეთი პოპულარული სიმღერები შექმნა, როგორებიცაა: I Want Your Love, Le Freak, Dance, Dance, Dance, Good Times. ხოლო მოგვიანებით კოლაბორაციები დევიდ ბოუისთან, მადონასთან და Daft Punk-თან ერთადაც ჩაწერა. მიუხედავად იმისა, რომ ნაილ როჯერსი ძირითადად დისკოსა და ფანკის სტილის შემსრულებელი იყო, მის მიერ შექმნილმა კომპოზიციებმა პოპ-მუსიკის მომავლის განსაზღვრაში უდიდესი როლი ითამაშა.

შეგახსენებთ, რომ ლეგენდარული ამერიკული ჯგუფი Nile Rodgers & CHIC შეკვეთილში Black Sea Arenа-ის მთავარ სცენაზე კონცერტს 2023 წელს გამართავს.