21 სექტემბერი ნულოვანი გამონაბოლქვის დღეა. ეს დღე 2008 წელს კანადაში დაარსდა და მიზნად წიაღისეული საწვავისა და ნახშირბადის გამონაბოლქვით გამოწვეული ზიანის შემცირებას ისახავს. კამპანია ცდილობს, ადამიანები წაახალისოს, რომ გახდნენ უფრო ეკომეგობრულები და აღარ დააბინძურონ გარემო.

ყოველი ჩვენგანისთვის მნიშვნელოვანი უნდა იყოს პლანეტაზე ზრუნვა, განსაკუთრებით კი დღეს, როდესაც მძაფრად ვხედავთ ბუნების უკურეაქციას ჩვენს ქმედებებზე. პერიოდულად საჭიროა, რომ გაჩერდე და დაფიქრდე, რა არის შენთვის პრიორიტეტული, ნულოვანი გამონაბოლქვის დღეც სწორედ ამისთვის შეიქმნა. დავფიქრდეთ, როგორ შეგვიძლია გარემო ნაკლებად დავაბინძუროთ და ჩვენთვის ერთი დღე მანქანის გარეშე შეიძლება არაფერს ნიშნავდეს, თუმცა დედამიწისთვის ეს დიდი შვებაა.

რამდენიმე მარტივი გზა, როგორ შეგვიძლია აღვნიშნოთ ეს დღე:
1) ფეხით, ველოსიპედით ან საზოგადოებრივი ტრანსპორტით წავიდეთ დანიშნულების ადგილას, რათა შევამციროთ კერძო ტრანსპორტის გამონაბოლქვი.

2) თუ რაიმე ძალიან მნიშვნელოვანი არ ხდება, დაიძინეთ ადრე და შეამცირეთ ელექტრო ენერგიის გამოყენება საღამოს საათებში.

3) გამოაერთეთ არასაჭირო ტექნიკა დენის წყაროდან

4) ტელევიზორის, ტელეფონისა და კომპიუტერის გამოყენების ნაცვლად, გაისეირნეთ, ნახეთ მეგობრები და ითამაშეთ სამაგიდო თამაშები - იქნებ ნულოვანი გამონაბოლქვის დღე თქვენი საუკეთესო მოგონებაც გახდეს.