ჩემი დღევანდელი საახალწლო ბლოგი ყველასთვის ცნობილ საახალწლო ტრადიციასთან - ბედობასთან იქნება დაკავშირებული. საქართველოს ყველა კუთხეში ბედობა 2 იანვარს აღინიშნება, მაგრამ როგორც უკვე ვიცით ყველა კუთხე სხვადასხვანაირად აღნიშნავს მას. იცოდი, რომ გურიაში ბედობას ფეხადობა ჰქვია, ხოლო მეკვლეს კი ფეხადი? შენთვის საყვარელი საახალწლო სასუსნავი მოიმარაგე და წაიკითხე ჩემი ბლოგი სადაც მინდა გაგიზიარო გურული ბედობა და მისი ტრადიციები.

გურულ საახალწლო წეს-ჩვეულების ყველაზე მნიშნელოვანი პირი ფეხადია.  ფეხადი არის ადამიანი, რომელიც კალანდას დღეს სხვაზე ადრე, პირველი შეაბიჯებს გურულ ოჯახში. გურულების აზრით, ოჯახში ფეხადის შემოსვლას დიდი დატვირთვა და  მნიშვნელობა აქვს, რადგან სწორედ მასზეა დამოკიდებული, ოჯახის უკვე დამდგარი წელი როგორ გაიმართება. სწორედ ესეთი მნიშნელოვანი ფუნქცია რომ აკრისია ფეხადს, ყოველი გურული ოჯახი ადრევე ემზადება და ცდილობს ყველაზე იღბლიანი ფეხადის დაპატიჟებას. ფეხადობაზე უარის თქმა სირცხვილად და შეურაცხყოფელად ითვლება.

ფეხადს რამოდენიმე ვალდებულება ეკისრება, ის კალანდას დროს, ადრე დილით, კარგათ გამოწყობილი უნდა მივიდეს ოჯახში და თავისი მოვალეობა შეასრულოს. სახლში შესვლისას აუცილებლად უნდა თქვას "აქა მშვიდობა“, ხოლო ოჯახი კი საუკეთესო ღვინით და კერძებით უმასპინძლდება მას. ფეხადმა აუცილებლად ყველა კერძი უნდა გასინჯოს სუფრაზე სადაც იწყება ფეხადობის ზეიმი და ახალი წლის მილოცვები.

მოემზადე კალანდისთვის და შენც შეარჩიე ფეხადი, რომელიც ჯანმრთელობას და იღბალს მოუტანს შენს ოჯახს ბედობის ანუ ფეხადობის დღეს და მისი ენერგია მთელი 2024 წელი გაგყვება.