ელვის პრესლი

ელვის პრესლი სახელგანთქმული ამერიკელი მომღერალი და მსახიობია, რომელსაც ხშირად როკ ენ როლის მეფედ მოიხსენიებენ. ის 1935 წელს მისისიპის შტატში დაიბადა, ხოლო მუსიკალური კარიერა 19 წლის ასაკში პროდიუსერ სემ ფილიპსის დახმარებით დაიწყო, რომელსაც  სურდა აფრო-ამერიკული მუსიკალური ტრადიცია ამერიკული აუდიტორიის უფრო ფართო ნაწილისთვის მიეწოდებინა. ფილიპსი არჩევანში არ შემცდარა, 1956 წელს მათი თანამშრომლობით გამოსული პირველივე კომპოზიცია Heartbreak Hotel ამერიკული ჩარტების სათავეში მოექცა, ელვის პრესლი კი როკ ენ როლის ახალ აღმოჩენად იქცა.

ელვის პრესლი იყო ერთ-ერთი პირველი არტისტი, რომელმაც საკუთარი საშემსრულებლო ოსტატობით სატელევიზიო ეთერები დაიპყრო და შემოქმედება მილიონობით ადამიანს გააცნო. პარალელურად ის აქტიურად მუშაობდა ჰოლივუდურ სტუდიებთან, რის ფარგლებშიც ათეულობით საუნდტრეკ ალბომი გამოსცა, თავად კი 30-ზე მეტ ფილმში მიიღო მონაწილეობა. მუსიკალური ჩარტების ისტორიაში ერთ-ერთი ყველაზე წარმატებული არტისტის კარიერა დაახლოებით 700-მდე მუსიკალურ ჩანაწერს და ათეულობით მილიონ გაყიდულ ალბომს მოიცავს. მიუხედავად იმისა, რომ ის საკმაოდ ადრე, 42 წლის ასაკში გარდაიცვალა, ლეგენდა ელვის პრესლის შესახებ დღემდე ცოცხალია.